الدهب غالي

الدهب غالي


تاني موضوع ليا بالعامية في المدونة..

الأول كان موضوع (أهلاً بيا) اللي كان بداية تعارف بيني

وبين التدوين والمدونين

النهاردة أنا جاي أقوللكو إني بحمد الله حصلت على المركز الأول

على مستوى الجامعات المصرية في مسابقة الشعر الفصيح

المقامة ضمن أنشطة أسبوع شباب الجامعات المصرية التاسع

فلازم الفرحة تكون بالمصري...وبالعامية :)
..


أنا بس حابب أضيف إن المسابقة ما كانتش سهلة أبداً

وكان فيه منافسة شرسة بين شعراء كتير مبدعين

وعلى فكرة أنا شايف بكل أمانة إن فيه جيل من الشباب

طالع هايكسر الدنيا في كل المجالات..مش الشعر بس

أجمل ما كان في الأسبوع هوه التواصل بين أبناء جامعات مختلفة

بنقل ثقافات متنوعة ضمن إطار موحد
..


والأجمل كان وجود الشاعر الأسمر الجميل أحمد بخيت في لجنة التحكيم

وقضائه معانا يوم كامل نسمعه ويسمعنا
..


طبعاً ما يفوتنيش إني أهني صديق العزيز جداً وزميلي

الشاعر/عمرو حسن

عمرو حصل على الدهبية في العامية

وحقيقي كان رائع بشهادة الجميع

في النهاية عايز أقول لأي إنسان راسم مشوار نجاح ليه

إنه هايتعب وعلى أد تعبه هايلاقي

وكل مرحلة سنية وإبداعية مختلفة عن اللي قبلها

لكن مهم يكون فيها زيادة من الخبرة والإتقان
..


من نجاح لنجاح لينا جميعاً ان شاء الله :)